மலை

அடர்ந்த மரங்களுடன்
சட்டென கீழிறங்கும் அருவியுடன்
பள்ளத்தாக்குகள் நிறைந்த
மலை பார்த்து
அவள் பயங்கொள்வது இல்லை

தன்னுடைய ஈரத்தை
எதன் மீதும் பரவ விடுகிற
மலைபற்றிய பெருமிதத்தில்
திளைத்திருப்பவளாக இருப்பதினால்
பிரவாகமாகும் தோழமையில்
சிற்றருவிகளும்
காட்டோடைகளும்
அவளிடம் பெருக்கெடுக்கின்றன

உள்ளூரின்
வழக்குமொழியில் மலையிடம்
அவள் பேச
பிரபஞ்சத்தின் ஆதிமொழியில்
அவளை மொழி பெயர்க்கிற
மலையிடமிருந்து
கற்றுக்கொள்கிறாள்

தியானத்தின் நிதானத்தையும்
திடத்தையும்
அவளிடம் கடத்திக்கொண்டே இருக்கிற மலை
அவளின் குருவாகவும் இருக்கிறது .

Sakthi Jothi