ஒரு பாம்பின் முட்டையை அடைக்காக்கும் சூட்டுடன்

கிள்ளிய தடம் முத்தமிடப் படும்
செந்நிறத்தில் நெய்கிறது மழை

அவ்வளவு அபத்தமாக உணர வேண்டிய
அவசியமில்லை
சிலர் அப்படித்தான் தம்மை முடித்துக்
கொள்கிறார்கள்
அதற்கு மேல் ஒன்றுமில்லை
அது அத்துணை தற்செயலானது
உங்களின் காதலுக்காக யாரோ தற்கொலைத்த
நாளும் நீண்ட காத்திருப்புக்குப் பின்னான
கரு அலசிப் போனதும்
நிச்சயம் யதேச்சையானது
அதற்கு மேல் ஒன்றும் இல்லை

இப்படி அழுவது மேலும் குற்றவுணர்வுக்கு
உள்ளாக்கும்
இனி வாழவே இயலாதென்று விஷம் அருந்திய
அதே கிழமையில் பிறிதொரு வருடம்
ஓர் மலையுச்சியில் புணர்ந்து கிடந்தேன்
இலட்சம் பேர் இறந்த அதே நாளில்தான்
யாரோ ஆயிரம் பேர் பிறக்கிறார்கள்

மேலும்
நீங்கள் உங்கள் துயரத்தில் பெருமிதம் கொள்ள
ஏதும் இல்லை

கழிவிரக்கத்தின் முள்கிரீடம்
இலட்சம் சிலுவைகளுக்குச் சமம்
நீங்கள் மனந்தேறுவீர்களாக

ஒரு பாம்பின் முட்டையை
அடைக்காக்கும் சூட்டுடன்
அந்த கண்ணீரை நீங்கள்
வழிய விட வேண்டாம்
தப்புகிறவனுடன் நீந்தும்
டால்பின்களை உங்கள்
ஸ்பரிசம் உணரட்டும்


நேச மித்ரன்