மகள் உடலில் பருவம் மேடிட தொடங்கும் பொழுது

மகள் உடலில்
பருவம்
மேடிட தொடங்கும் பொழுது
அம்மா தடுமாறுகிறாள்
தகுந்த ஆடைகள் கொடுக்கவும் 
உள்ளாடைகளை அறிமுகம் செய்யவும்

புதிர்கள் தொடங்குகிற இளமை
ஒருவருக்கொருவர்
பொறுமையிழக்கும்
கணங்களைக் கொடுக்கிறது
என்றபோதும்
மகளின் புதிய உலகிற்கு
அம்மாவே கதவாக இருக்கிறாள்

மகள் வளர்கிறாள்
அம்மாவைப் போலவே
வளரிளம் இரகசியங்களோடும்
வலிகளோடும்

பெண்மையின் பாடலில்
இருவரும் நெருக்கமாகிறார்கள்

உடலின் திறப்பினை
மகள் உணரத் தொடங்கும்
ஒரு நாளில்
அம்மாவின் நினைவில்
மகள் கசிகிறாள்.
Courtesy : Painting - Faiza Khan
Sakthi Jothi