வெயிலும் மழையும்

வெயிலும் மழையும்
கலந்து பொழிகையிலெல்லாம்
நினைவுக்குள் மொக்கவிழ்க்கிற
ஒரு மழை நாளின்
வெதுவெதுப்பும் 
வெயிலாடும் சிறு பூவும்
இப்போதும் சிலிர்க்கச் செய்கிறது

மரங்கள் அடர்ந்த மலைச்சரிவில்
பொழிந்த
குறிப்பிட்ட அந்த மழை
அப்படியிருந்தது
வெயிலோடு மினுங்கும்படி
பூவொன்றை மலர்த்தும்படி

இன்று
அப்படியான மழை இல்லை
வெயிலும் இல்லை
என்றபோதும்
மழை நனைத்த வெயில்
நினைவுக்குள் இதழ் விரிக்கிறது

வாசமாகவோ வலியாகவோ
பதிந்திருப்பவைகளுக்கு
பருவங்கள் ஏதும் இல்லையென
மீண்டும் உணர்கிறேன்.

Sakthi Jothi